කැරට් කේක් හදමු……..

කට්ටිය බලනවා ඇති මොකෝ මේ උපසිරැසි ගැන පෝස්ට් දාපු රොයිලි ඉවුම් පිහුම් ගැන පෝස්ට් දාන්න අරන් තියෙන්නේ මොන හේතුවක් හින්දද කියලා. 😛 😛

කවුරුවත් නොදන්නව වුණාට මමත් ඔය ඉඳලා හිටලා හදන්න ලේසි කෑම ජාති එහෙම හදනවා. හදනවා විතරක් නෙවෙයි මූණූ පොතේ එහෙමත් දාලා තියෙනවා. ඒත් ඉතින් අද හිතුනා ඔන්න ඔහේ එහෙම හදපු, හිතුවට වඩා බොහොම රස වෙච්ච එක කේක් එකක් හදන හැටි ගැන පෝස්ට් එකක් දැම්මනම් හොඳයි කියලා. මම මුලින්ම මේක හදන හැටි දැනගත්තෙනම් මෙතනින්. මේ තියෙන්නේ මම හදපු හැටි.

මෙන්න මේවා තමා ඕනාවෙන දේවල්.

• බිත්තර තුනයි
• සීනී 300 g
• පිටි 300 g
• කැරට් 400 g
• එලවළු තෙල් 200 ml
• බේකින් පවුඩර් 16 g
• ලුණු ස්වල්පයක් හා අයිසින් ෂුගර්.

මුලින්ම කැරට් හොඳට සුද්ධ කරලා සිහින් වෙන්න ගාගන්න ඕනා. කැමති නම් බ්ලෙන්ඩරයකට දාලා ගත්තත් අවුලක් නෑ. ඒක පැත්තකින් තියාගන්න.

ඊලඟට බිත්තර තුන කඩලා දාලා ඒක ගහගෙන ඒකටම සීනීයි තෙලුයි දාලා හොඳට මිශ්‍රකර ගන්න ඕනා.

ඊට පිටි හා බේකින් පවුඩර් එකට කලවං කරගෙන ඒකත් මේ මිශ්‍රණයටම එක් කර හොඳින් මිශ්‍රකර ගන්න.

ඊට පස්සේ මේකටම අර කලින් ගා ගත්තු කැරට් ද එකතු කරලා හොඳට කලවං කර ගන්න.

ඊට පස්සේ බටර් ගාගෙන් පිටි තවරාගත් තැටියකට මේ මිශ්‍රණය දාගෙන 180 °C උෂ්ණත්වයක විනාඩි 30ක් පමණ පුළුස්සා ගන්න. ඒක නිවිච්චහම උඩින් අයිසිං ෂුගර් ඉහාගන්න.

දැන් ඉතින් කන එක තමා තියෙන්නේ. මම මුලින් හිතාගෙන උන්නට වඩා ඇත්තටම රහයි. බොරුනම් හදලා බලන්නකෝ.

උඩම තියෙන පිංතූරේ ගත්තෙ මෙතනින්.