බයිස්කෝප් සිංහලෙන් හා මම I

ගොඩක් අය නොදන්න මගේ සිංහල බ්ලොග් එකේ උපසිරැසි පිටුවනම් නිතරම යාවත්කාලීන වුනත් මුල් පිටුවට කාලෙකින් පෝස්ට් එකක් දාන්න බැරුව බ්ලොග් එක වේලන්න හොඳ නැති නිසා මට හිතුනා ලිපියක් ලියන්න. මොකක් ගැන ලියන්නද කියලා හිතන කොට මට හිතුනා මුල් පිටුවට ලිපි නොවැටෙන හේතුව ගැනම ලිව්වනම් හොඳයි නේද කියලා. ඒකට ඉතින් හේතුව වෙන මොකක්වත් නෙවෙයි. බයිස්කෝප් සිංහලෙන් අඩවිය සමඟ මම අල්ලන අඩව්වනේ. 😛 කොහොම වුනත් අන්තිමේදි කල්පනා කළා බයිස්කෝප් අඩවිය සමග දැනට අවුරුද්දක් විතර වෙන්න කිට්ටු වෙන මගේ ඉතිහාසය කෙටියෙන් ලියන්න.

අන්තර්ජාලය සමඟ මගේ ඉතිහාසය 2006 තරම් ඈත කාලයක සිට පටන් ගත්තත් මුල් කාලයේ මට වැඩි වෙලා ජංජාලයේ ගත කරන්න ලැබුන් නෑ කිව්වොත් නිවැරදියි. මොකද ලංකාවේ රැකියාව කරන ස්ථානයේ දවසකට ගත කළ පැය 8-9 තරම් වෙච්ච කාලය තුල හැම වෙලාවෙම පරිගණකය ඉස්සරහ ජංජාලය සමඟ ගණුදෙනු කළත් ඒ සියල්ලම රැකියාවටම පමණක් සීමා වුණා කිව්වොත් නිවැරදියි. ඉඳලා හිටලා මේල් පරීක්ෂාකරපු එක ඇරුනම. ඉතින් රැකියාවෙන් පිට අන්තර්ජාලය සමඟ මම ගත කරන කාලය හරියටම පටන් ගත්තේ හරියටම කියනවනම් 2008 ජනවාරී මාසයේ කිව්වොත් නිවැරදියි. ඒ වෙද්දි ලංකාවෙන් පිටවෙලා දුරු රටකට වෙලා මගේම කියලා ලැපක් එහෙම අරගෙන තමයි හිටියේ. වෙනවිදියකින් කියනවනම් හරියටම මෙහෙදි මම උපයපු පළවෙනි වැටුපෙන් කලේ මේ ලැප ගත්තු එක තමයි. අදටත් මම ගාව තියෙන N70 දුරකථනය කේබල් එකෙන් අමුණගෙන එහෙම තමයි මුලින්ම අන්තර්ජාලයේ සැරිසරන්න පටන් ගත්තේ. එහෙම කරනකොට වේගය ගැන කියන්න දෙයක් නෑනේ. 🙂 ඇත්තෙන්ම කියනවනම් දවසේ ගමන් මාර්ගය වුණේ මේල් ටික බලලා හැට හුටාමාරකට ඒ ටික යවලා පත්තර දෙක තුනක් කියවලා කෙලින්ම යනවා යාළු chat එකට. එහෙම නැත්තම් yahoo එකෙන් චැට් කරන එක තමා කරපු එකම දේ. දැන් කල්පනා කරද්දි ඒක බොහොම බොළඳ වැඩක් විදියට හිතුනත් ඒක නිසාම තමයි මම මුලින්ම සිංහල යුනිකෝඩ් ගැන දැනගන්න ලැබුනේ. ඒ වගේම දැන් චැට් රූම් සහ යාහූ චැට් පැත්ත පලාතක නොගියත් අදටත් මූණු පොතේ ඉන්න යාළුවෝ කණ්ඩායමක් ඒකෙන් හමුවුණා කිව්වොත් නිවැරදියි. එක දවසක් යාළු චැට් එකට වැටුනු සිංහල අකුරු ටිකක් නිසා ඒක මොකක්ද කියලා හොයලා බලද්දි තමයි මම සිංහල යුනිකෝඩ් ගැන දැනගත්තේ. මොකද මටත් ඕනා වෙලා තිබ්බා සිංහලෙන්ම අකුරු පේන්න දාන්න. නැත්තම් සමහර වෙලාවට ඉංග්‍රීසි අකුරෙන් මම ලියන දේවල් වැරදි විදියට අනික් අයට තේරුම් ගිය වෙලාවල් තිබ්බ නිසා.

හැබැයි ඔහොම යුනිකෝඩ් ගැන දැනගද්දි 2009 අවුරුද්දෙ ජනවාරි විතර වුණා. 🙂 ඔය අතර දෙයියෝ දුන්නා වගේ රැකියාවේ හොඳ මාරුවක් සිද්ධ වුණා. ඒ මාරුව නිසා දවසේ පැය 24 පුරාම අන්තර්ජාලයට යන්න හොඳ ADSL සම්බන්ධතාවයක් හා විශේෂයෙන්ම ඒක නොමිලේ ලැබීම යන කරුණු කාරනා ඉටුවුණා. ඔන්න ඉතින් මමත් ටොරන්ට් වලින් චිත්‍රපටි බාගත කර ගන්න එහෙම පටන් ගත්තා. හැබැයි ඒ වෙද්දි සින්ඩිය ගැනවත් බයිස්කෝප් අඩවිය ගැනවත් කිසිම දැනුමක් තිබ්බෙ නැහැ. මේ අතරතුරේ තමයි සිංහල බ්ලොග් කරුවන්ගේ සංගමය හා සින්ඩිය දැන ගන්න ලැබුනේ. ඊට පස්සෙ චැට් රූම් සියල්ල අතාරැලා දාලා මමත් නිතරම සින්ඩියේ පාඨකයෙක් බවට පත් වුණා. දැකපු මුල්ම ලිපියකින් (අවාසනාවට මට දැන් එහි වෙබ් ලිපිනය මතක නෑ 😦 ) දැන ගත්තු Google Reader එක නිසා සින්ඩියේ සියළුම ලිපි හා මම නිතර ගැවසිච්ච ප්‍රවෘත්ති අඩවි වල ලිපි reader එකට ග්‍රහනය කර ගන්න ලැබුනා. ඔය අතර තමයි අපේ පොතේ ගුරා සහෝදරයා පටන් අරගෙන තිබුනු බයිස්කෝප් සිංහලෙන් අඩවිය දැක්කේ. ඒක මුලින්ම තිබ්බේ Blogspot අඩවියක් විදියට වගෙයි මට මතක.

දෙවෙනි කොටස……